*(५) * *(आधुनिक बलुतेदार)*
असा पेपरवाला कितीजणांना भेटलाय... आजकालची तरुण पिढी इ-पेपरच वाचत असते. फक्त जेष्ठांना मात्र समोर पेपर हवा असतो, असं मला वाटतं, तेव्हां हा पेपर वाला त्यांना जास्त जवळचा वाटला असावा.
आतां आजच्या बलुतेदाराला भेटू.
*भाजीवाला*
पूर्वी प्रत्येकाच्या शेतांत थोडंफार माळवं असायचं. माळवं म्हणजे भाजीपाला, घराच्या परसांतही झाडं, वेली असायच्याच. त्यामुळे भाजी शक्यतोवर घरचीच असायची. इतरांच्या शेतांतील वानवळा,वानोळा (नमुनाही) असायचा.
त्यामुळे भाजीवाले हा प्रकार जवळपास नव्हताच.
पण आतां...
दारावर भाजी घेऊन येणारे भाजीवाले किंवा भाजीवाल्या आपला मोठा प्रश्न सोडवणारे मदतनीस असतात. बाहेर जाऊन पायपीट न करावी लागता ते स्वतः मात्र पायपीट करून आपल्याला घरपोच भाजी आणुन देत असतात. वर्षानुवर्षे त्यांच्याकडून भाजी घेत गेलं कीं कोणत्या वेळेस कोणाला काय पाहिजे असते हे त्यांना बरोबर कळते. "घ्या ना ताई, तुमच्यासाठी मुद्दाम आणल्या बघा शेवग्याच्या शेंगा, ताज्या आहेत एकदम' असं म्हटलं कीं किती बरं वाटतं, पण त्याच वेळी ""एवढ्या महाग काय,जरा कमी कर, बाजारात तर स्वस्त मिळतात." अशी आपण जेव्हां घासाघीस करत असतो तेव्हां त्यांच्या डोक्यावर किंवा हातगाड्यावर भलं मोठं ओझं घेऊन ते उन्हांतान्हांत किती किलोमीटर पायपीट करतात हे आपण सोयीस्कर पणे नजरेआड करतो. आणि अशा किती तरी गोष्टी फिक्स रेट असलेल्या माँलसारख्या ठिकाणी निमुटपणे घेऊन टाकतो हे ही विसरून जातो.
याऊलट एखाद्या वेळेस त्यांना चहा निदान थंड पाणी जरी देऊ केले,त्यांच्या घरच्यांची चौकशी केली तर त्यांच्या मनांत अगदी कृतकृत्य झाल्याची भावना निर्माण होते.आणि नेहमीसाठीच एक ऋणानुबंध तयार होतो.
आतां आँनलाईनच्या काळांत तर याचा चांगलाच अनुभव येतोय.
- आतां पुढच्या बलुतेदाराची ओळख करून घेऊ… पुढच्या भागांत
सौ.भारती महाजन - रायबागकर
bharati.raibagkar@gmail.com
9763204334
