आषाढगान

 शीर्षक- *आषाढगान*

आषाढाच्या प्रथम दिवशी

महाकवी कालिदास दिन

मेघदूतासम प्रसिद्ध काव्य

नाटकंही असती प्राचीन

वैशाखाच्या वणव्यामाजी

शुष्क, तृषार्त धरा तप्त

*येता बहरून आषाढ*  

प्राशुनी अमृत होई तृप्त

चराचरातील सृष्टीचेही

सुरु जाहले *आषाढगान*

पसरे हिरवा रंग सभोती

न्हाऊ घातले अवघे रान

मिरविती थेंब मोत्यांचे

हिर्वी पानं अंगावरती

जलद फिरती अंबरात

उतरण्यास अवनीवरती

बरसती आषाढधारा

वाट पाही चातक पक्षी

हिरव्या हिरव्या गालिच्यावर

गवतफुलांची रंगीत नक्षी

संजीवनी ठरे सकळांस

दुजे नांव आषाढाचे

बळीराजा, भुमी, वारकरी

स्वागत करू जलधारांचे

सौ. भारती महाजन रायबागकर

चेन्नई