कारगिल विजय दिन

 *कारगिल विजयदिन*

     ‌    *पोवाडा*

उणे साठ डिग्री तापमान

हाडं गोठवणाऱ्या, बोचऱ्या थंडीचे

नगाधिराज हिमालयाच्या

बर्फाच्छादित पर्वतराजींचे

पर्वतराजींचे हो...जी...जी...जी...रं जी

आले बेसकॅम्पला आपले सैनिक

करारातील नियम पाळण्याला

जरा उसंत मिळेल, वाटले

परि शत्रुने घातला घाला

घातला घाला हो...जी...जी...जी...रं जी

जाणुनिया इरादा गनिमाचा

जांबाज जवान मुळी ना डगमगले

ऊरी राष्ट्रप्रेम जाज्वल्य

लढण्यास सिद्ध जहाले

सिद्ध जाहले हो...जी...जी...जी...रं जी

गर्जा *भारत माता की जय*

बोला *हर हर महादेव*

तुटून पडले, त्वेषाने वैऱ्यावर

एकेकाला चढला होता चेव

चढला होता चेव हो...जी...जी..जी..रं जी

सत्त्याहात्तर दिवस धुमश्चक्री

युद्ध झाले अतिशय घमासान

विसरुनी मुलं, माणसं, घरदारं

लढतांना कसे हरपले भान

हरपले भान हो...जी...जी...जी...रं जी

सव्वीस जुलै एकोणवीसशे नव्याण्णव

*कारगिल विजय दिन*  मान

तिरंग्यात लपेटून, कित्येक

हिंदुस्तानाची राखली शान

राखली शान हो...जी...जी...जी...रं जी

सौ. भारती महाजन-रायबागकर

चेन्नई

२६-७-२१.