पुन्हा तुझाच पुकारा

 *पुन्हा तुझाच पुकारा*

तप्त होऊनी अवनीचा

उष्ण, श्वास-नि:श्वास

गंध ओल्या मातीचा

मन भरून घेता खास

धसमुसळ्या जलदांनी

अत्तर कुप्या लवंडल्या

भांडणांचा लाभ आम्हां

मनकुंभ भरुनी गेल्या

साठवण? नसे युक्ती

निरंतर अनुभूती घेण्यास

धरा तावून-सुलाखून

तेव्हांच मिळे हमखास

असे अद्भुत रसायन

कस्तुरी सुवास अहा!

हस्तलाघव निसर्गाचे

*एकस्व* घेतले पहा

आलबेल असता, कवतिक

संगम महाप्रलयात

खारं पाणी डोळ्यांतलं

मिसळलं निष्ठुर गोड्यात 

आतां गंध नकोसा ओला

स्पर्शही उठवी शहारा

पण रखरखत्या वाळवंटी

*पुन्हा तुझाच पुकारा!*

सौ. भारती महाजन रायबागकर

 चेन्नई

९७६३२०४३३४