11आधुनिक बलुतेदार

 *(11)* *आधुनिक बलुतेदार*

       -सध्यां या लाँक डाऊन च्या काळांत आपण सगळे घरात बसलो असलो तरी डॉक्टर्स मात्र जिवाचं रान करून पेशंटला वाचवण्याचा प्रयत्न करताहेत. अशावेळी त्यांच्या घरच्या माणसांची मन:स्थिती काय होत असेल याची कल्पना केलेली बरी. देवाहून काय कमी आहेत ही मंडळी आतां ! आणि 'ओल्याबरोबर सुकंही जळतंय' त्याप्रमाणे *सगळेच* डॉक्टर्स गैरसमजाच्या वावटळीत सांपडले जात आहेत. अशावेळी सगळ्यांनीच तारतम्याने आणि विवेकाने वागायला हवे, हो नं…!

 आतां ओळख करून घेऊ आजच्या बलुतेदाराची…

                 *शिंपी*

- पूर्वी गांवात एखादाच शिंपी असायचा. क्वचित एखादी महिला घरगुती शिवणकाम करून  द्यायची.

फॅशनचा तर प्रश्नच नसायचा. मुलांचा एखादा कपडा सैल झाला तर वाढत्या अंगाचा शिवला असं म्हणता येई, लहान झाला तर बहुतेक लहान भावंडं असायचंच घालायला. जुन्या बायकांच्या चोळ्या एकाच प्रकारच्या असायच्या. आणि ब्लाऊज ही अंगासरशी झालं कीं 'ब्येस' असायचं. त्यामुळे शिंप्याचं काम सोप्पं असायचं…

आतां मात्र समस्त महिलावर्गाचा जिव्हाळ्याचा आणि काळजीचा विषय असणारा हा अवलिया... पुरूषांनाही याची गरज असतेच पण बरेच जणांचा कल आता रेडीमेड कपडे वापरण्याकडे आहे. पुष्कळदां त्यांचा ब्रँड ठरलेला असतो. त्यामुळे त्यांना फारशी फिकीर नसते. शिवून घ्यायचे असले तरी एकच शिंपी ठरलेला असतो. आणि फॅशनला फारसा वाव नसल्याने तक्रारीचंही कांही कारण नसते. आजकालच्या आधुनिक तरूणांची बात मात्र निराळीच.

महिलांचं मात्र सध्या कोणती नवीन फॅशन 'इन' आहे, आणि (जी लगेच बदलत असते) त्याचं बारीक निरीक्षण असतं. पूर्वी फक्त साडी वरील मॅचिंग ब्लाऊजचा समावेश असायचा.फारतर गळ्यांच्या लांबी-रूंदीत, क्वचित व्ही.कट,बदामी,चौकोनी असा भूमितीच्या आकारानुसारही फरक पडे. आतां पंजाबी सलवार- कमीज, चनिया चोळी,मिडी,मँक्सी इ.इ.कपड्यांचा ही प्रश्न उभा राहतो.(आणखी काय काय असतं? मला एवढीच नावं माहिती आहेत, जाणकारांनी माझ्या ज्ञानांत भर घातली तरी चालेल.) 

रेडिमेड घेतले तरी फिटिंगचा प्रश्न असतो आणि शिंप्याचेच पाय धरावे लागतात.(शिंपी त्याच दुकानचा असला तरी) ब्लाउजचे विविध प्रकार असतात, आणि शिंप्यांना (छे..छे, त्यांना आता फॅशन डिझायनर असं संबोधतात.) ते सर्व आत्मसात करावे लागतात. आता त्यासाठी ते रग्गड शिलाई (चार्ज) सांगतात, जी खूपदा  *घडाईपेक्षा मढाई जास्त* असली, तरी ती देण्याची आपली एका पायावर तयारी असते. आखिर लेटेस्ट फॅशन का सवाल है भाई…(बाई)

- एखाद्या लग्नासारख्या जंगी कार्यक्रमांच्या निमित्ताने शिवायला टाकलेले कपडे वेळेवर मिळेपर्यंत आपला जीव खालीवर होतो.एकतर ते इतके विविध प्रकारच्या फँशनचे असतात कीं बस्स.अखेर संपूर्ण कार्यक्रमांत सर्वांच्या नजरा आपल्याकडे वळल्या आहिजेत नं!

 " तुम टैम पर जल्दी देने वाले थे ना "

 या आपल्या प्रश्नावर " किस किस को दु मॅडम, सभी को जल्दी होती है, जरा पहिले कपडा लाते जावो ना" असं बजावून सांगतो, आणि "अरे, फॅशन बदल जाती है न तबतक "या आपल्या उत्तरावर' 'क्या करे इन औरतोंका' असा मिश्किल भाव त्याच्या चेहऱ्यावर असतो.

'कितना कपडा लगेगा' या आपल्या प्रश्नावर तो आपल्याकडे 'आपादमस्तक' बघत कपडा सांगतो.(कारण आपल्याला कळलंच असेल☺️) आणि “इतना कपडा क्यूं लगता है, वो फलाणा तो इतनाच लेता है” या आपल्या तक्रारीवर 'पुन्हां एकदां आपल्याकडे बघत' “मैंने तो बहुत कम बोल दिया है, नहीं तो इससे भी जादा लगता है, आपको किसके पास सिलाना है,सोच लो." असं ठणकावून सांगतो. तरीही तो 'कपडा खातोच ' हे आपलं मत कांही बदलत नाही, पण सांगायचं कोणाला, आपण घरी तर शिवु शकत नाही, आणि दुसरा शिंपी शोधला तरीही तो ह्याचाच भाऊ असणार नाही कशावरून... नव्हे असणारच!

'तेव्हां पुढच्या वेळेस याच्याकडेच यावं लागलं तर....

आतां उद्या पुढच्या बलुतेदाराची ओळख करून घेऊ...

सौ. भारती महाजन- रायबागकर, bharati.raibagkar@gmail.com

9763204335