4 *आधुनिक बलुतेदार*

 *(4)*  *आधुनिक बलुतेदार*

याआधी आपण दूधवाल्याची नव्याने ओळख करून घेतली. आतां दुधाच्या पिशव्या मिळत असल्यामुळे ते किती फँटचं आहे हे वरूनच कळतं, त्यामुळे पाणी घालण्यापेक्षा फक्त उशिरा येणारा किंवा आधी सुचना न देता दूध देणारा एवढाच मुद्दा राहतो…

              *पेपरवाला*

      पूर्वी खेड्यांत घरोघरी कुणी पेपर वाचत नसत. जवळपास सर्वच जण निरक्षर असत. क्वचित दोन चार शिकलेल्या डोक्यांसाठी ग्रामपंचायतीतील हक्काचे पेपर असतंच.

आतां मात्र....

    असाच आपल्या कुटुंबाशी निगडित असलेला एक अपरिहार्य सदस्य म्हणजे पेपर टाकणारा... याच्यांत आणि दूधवाल्यांत खूप साम्य आहे. आपल्याला जसा सकाळचा चहा ताज्या दुधाचाच लागतो, तसाच त्या चहाची लज्जत वाढवण्यासाठी सोबत ताजा पेपर ही लागतो. मग भलेही आदल्या दिवशी त्या बातम्या टीव्हीवर बघितलेल्या असतील आणि त्याच त्याच,निरर्थक म्हणुन वैतागलेही असु.पण पेपर यायला जरासा उशीर झाला कीं आपल्या आत बाहेर फेर्‍या सुरू होतात आणि अशावेळी जर तो पेपर टाकणारा आपल्या तावडीत सांपडला कीं आपला भडिमार सुरु होतो तो अगदी, "बंद करून टाक पेपर उद्यापासून" येथपर्यंत येऊन थांबतो. बहुतेकदां ही मुलं अगदी पोरवयातील असतात. दूधवाल्या प्रमाणे त्यांनाही थंडीची, पावसाची पर्वा न करता पेपर भिजु नये याची काळजी घेत पहाटेच उठून पेपरचे गठ्ठे घेऊन फिरावं लागतं.नाहीतर मालकाची बोलणी ठरलेलीच,शिवाय कामावरून काढुन टाकण्याची टांगती तलवार. पण प्रत्येकालाच तो लवकर पेपर कसा देऊ शकेल हे आपल्या ध्यानांतच येत नाही.

     कांहीजण सकाळी पेपर टाकुन दुपारी शिक्षण घेत असतात. कारण बहुतेक जण गरीब परिस्थितीतीलच असतात. घराला हातभार लावण्यासाठी त्यांना अशी कांही कामं करावी लागतात. आणि कधीकधी मालक आणि गिऱ्हाईक म्हणजे आपण अशा दोघांची बोलणीही खावी लागतात.

मालकाला तर आपण कांही सांगु शकत नाही,तेव्हां आपणच थोडंसं संवेदनशीलतेने वागलो तर....

आतां ओळख करून घेऊ पुढच्या बलुतेदाराची… पुढच्या भागांत

सौ. भारती महाजन- रायबागकर

चेन्नई

9763204334

bharati.raibagkar@gmail.com