3 आधुनिक बलुतेदार

 *(३)*  *आधुनिक बलुतेदार*

याआधी  आपण बलुतेदारी बद्दल

वाचलं, आतां बघुयात *आधुनिक बलुतेदार*  कोण कोण आहेत ते...

           *दुधवाला*

 पूर्वी खेड्यांत घरोघरी गाई, म्हशी असायच्या, किमान एखादी शेळी

 तरी नक्कीच असायची. दूध क्वचितच विकत आणावं लागे. आणि परिस्थितीनुसार आणावं लागलंच तर ज्याच्या घरी मुबलक दूध त्यांच्या घरी जाऊन आणायचं ही पद्धत, त्यामुळे घरोघरी जाऊन दूध देणारा दुधवाला तेव्हां अस्तित्वात नसावा.  

        दूधवाल्याच्या हांकेबरोबरच बेल वाजते आणि आपण साखरझोपेतील स्वप्नांतून एकदम जागे होऊन वास्तवात येतो, स्वयंपाकघरांतुन भांडी घेऊन दार उघडतो, डोळे चोळत चोळत दुध घेतां घेतां भैयाला म्हणतो, ' इतनी जल्दी कायको आता हैं? हमारी नींद मोडती हैं ना! तो आपलं झोपेइतकंच मोडकं हिंदी ऐकुन म्हणतो," बहनजी, बाकी सब लोगों को भी ताजा दूध की ही चाय लगती हैं, इसलिये जल्दी आना पडता हैं, देर हो गई तो उनका भी मूड खराब होता हैं ना "असं म्हणत तो घाईघाईने पायऱ्या उतरून जातो सुद्धां.....

   संवयीप्रमाणे आपण स्वयंपाक घरात येऊन चहाचं आधण ठेवतो. मनाशी म्हणतो, आपल्यालाही ताज्या दुधाचा पहिला चहा लागतो नाहीतर अजिबात फ्रेश वाटत नाही. भैया उशिरा येऊन कसं चालेल! त्याला तर आपल्यासारख्या सगळ्यांच्याच वेळा सांभाळाव्या लागत असतील. एखादा दिवस तो उशिरा आला तर आपणच त्याला रागावत असतो. आपल्याला हसू येतं, खरंच आपला दिवस सुरू होतो दूधवाल्या पासून, आपल्याला वेळेवर दूध मिळावं म्हणून त्याला किती लवकर उठावं लागत असेल याचा विचार आपल्या डोक्यात कधीच येत नाही. आता दूधांत घालणाऱ्या पाण्याचं प्रमाण या विषयावर गृहिणी आणि दूधवाला यांच्यातील घरोघरी होणारा  संवाद हा एक मनोरंजनाचा विषय असतो…"इतना पानी कायकु डालता है दुधमे?बरं,डालता है तो बिसलरीका डालते जाव नं,हमारा पोट बिघडता नं…इ.इ.इ.

काय,बरोबर नं?

पुढच्या बलुतेदाराची ओळख...पुढील भागांत

सौ. भारती महाजन रायबागकर

चेन्नई

9763204334

bharati.raibagkar@gmail.com