6 आधुनिक बलुतेदार

 *(6)*     *आधुनिक बलुतेदार*

तर कितीजण भाजी विक्रेत्यांकडुन घासाघीस न करता काय काय भाजी घेतात! जरा गंमत केली...

आपण त्यांच्या मेहनतीचे मोल जाणण्याएवढे संवेदनशील नक्कीच आहोत.

आतां या बलुतेदाराला भेटु…

            *फुलपुडीवाला*

-पूर्वी घराच्या अंगणात किंवा शेतांत कन्हेर, जास्वंद, तगर, झेंडू अशी फुल झाडं असायची. सुवासिक नसली किंवा साधी गांवठी जरी असली तरी लोकांची देवपुजेची गरज भागायची. आणि पोरी-बाळीही तीच फुलं घालुन झोकांत मिरवायच्या.

- आतां शहरांत अंगण नाहीच, क्वचित कोणाकडे टेरेस किंवा बाल्कनी असते.पण त्यातुनही आवड असली तर अनुकुलता नसते आणि अनुकूलता असली तर आवड नसते,अशी दांत आणि चण्याच्या गोष्टीसारखी गत. आणि पुष्कळ दा दोन्ही असले तर सवड नसते. मग यावर ऊपाय काय तर फिरायला गेल्यावर दुसऱ्यांची बाग आपलीच समजावी लागते.आणि आपल्या आधी दुसऱ्या कोणी ती फुलं (अगदी कळ्यासुध्दा) तोडुन नेल्या तर त्यांच्या देवभक्तीचा ऊध्दार करत दुसऱ्या दिवशी लवकर येण्याचा निर्धार करावा लागतो.अशावेळी ते फुलझाडांचे मालक/ मालकिन 'फुलवली फुलझाडें दारी, फुलें कां नेती शेजारी' असं म्हणुन नक्कीच कपाळाला हात लावत असतील.

याला पर्याय म्हणून भाजीवाल्यां प्रमाणेच फुल पुडी आणून देणारे आपली देवपूजा साग्रसंगीत पार पाडण्यास हातभार लावतात. देवपूजेला फुलवाल्यांचा आधार असतो आणि चातुर्मासात लागणाऱ्या बेल, दुर्वा, आघाड्यासाठी ही त्यांचीच मनधरणी करावी लागते. एखाद्या फुल विक्रेत्याकडून आपण नेहमीच फुलं घेत गेलो तर तो आपल्याला चांगली ताजी फुलें देतो. आपल्या सोबत कधी आपले 'हे' असले तर, "साहेब, मोगर्‍याचे गजरे घ्या ताईंसाठी, ताज्या कळ्या आहेत बघा" असा सुगंधी आग्रहही करतो.

आतां ओळख करून घेऊ आणखी एका बलुतेदाराची… पुढच्या भागांत

सौ. भारती महाजन- रायबागकर. चेन्नई

9763204334